శీతాకాలంలో చర్మం ఎక్కువ పొడిబారటం సహజం. దీనికి చాలా మంది కోల్డ్‌క్రీమ్‌లు వాడుతుంటారు. అయితే వేరే పద్ధతుల్లోనూ పొడి చర్మానికి మరింత ఆరోగ్యాన్ని అందించవచ్చు. అవే చర్మాన్ని తేమగా ఉంచే మాస్క్‌లు. వీటిలో ఓవర్‌నైట్‌ మాస్క్‌, సూపర్‌ఫుడ్‌ మాస్క్‌, షీట్‌ మాస్క్‌లు అందాన్ని, చర్మ ఆరోగ్యాన్ని పెంపొందిస్తాయి. అవేంటో చూద్దాం.
ఓవర్‌నైట్‌ మాస్క్‌: ఇది నిద్రపోతున్నంతసేపూ చర్మంపై పనిచేస్తూ శరీరాన్ని తేమగా ఉంచడానికి సహకరిస్తుంది. పొడి చర్మం ఉన్న వారికి మరింత మేలు చేస్తుంది. ముఖ్యంగా గాలి, చల్లని వాతావరణం కారణంగా ఏర్పడే పొడి చర్మానికి మంచి పరిష్కారం. సరైన పద్ధతిలో ఓవర్‌నైట్‌ మాస్క్‌ను వాడితే అద్భుతమైన ఫలితాలు ఉంటాయి. దీన్ని వేసుకునే ముందు ముఖాన్ని శుభ్రంగా కడుక్కోవాలి. ఆ తర్వాత ఈ మాస్క్‌ను 5-10 నిమిషాలు మృదువుగా అప్లై చేయాలి. అయితే తప్పనిసరిగా సూచనలు పాటించగల్గితే మంచి ఫలితాలు ఉంటాయి.
సూపర్‌ ఫూడ్స్‌ మాస్క్‌: క్రాన్‌బెర్రీ, పసుపు, అవకాడో వంటి ఫుడ్స్‌ శీతాకాలంలో శరీరానికి మంచి పోషణ అందిస్తాయి. ఇవి ఉన్నతమైన గుణాలు కలిగి, శరీరానికి అవసరమైన ఆరోగ్యాన్ని ఇస్తాయి. శీతాకాలంలో పొడి వాతావరణానికి పాడైన చర్మానికి కాంతినివ్వడంలో బాగా పనిచేస్తాయి.
షీట్‌ మాస్క్‌: సౌందర్య పరిశ్రమలో షీట్‌ మాస్క్‌లు కొత్తగా వచ్చిన ఉత్పత్తులు. తక్కువ సమయంలోనే ఎక్కువ మందిని ఆకర్షిస్తున్న ఉత్పత్తులు కూడా ఇవే. షీట్‌లా ఉండే వీటిని వాడటం చాలా సులభం. అంతేకాదు, తక్కువ సమయంలోనే శరీరానికి కావాల్సిన తేమను అందించగల సుగుణాలు ఈ మాస్క్‌లో ఉన్నాయి. తక్షణ తేమతో పాటు కాంతివంతమైన చర్మాన్ని అందిస్తాయి. చల్లని వాతావరణంలోకి వెళ్లబోయే ముందు ఈ మాస్క్‌ను వాడితే తక్షణ మెరుపు వస్తుంది.
ఇవి కాకుండా ఇంట్లోనే సొంతగా మాస్క్‌లు తయారు చేసుకోగల్గితే మరింత మంచిది. బొప్పాయి, టమాటా, అరటిపండ్లకు తేనె, శనగపిండిని కలిపి చేసుకునే మాస్క్‌లూ చర్మానికి తేమనిస్తాయి.
